Allt í köku er sérvöruverslun með fjölbreytt og mikið úrval vara til kökuskreytinga, sykurmassaskreytinga, konfektgerðar og baksturs. Einnig er hægt að fá ótrúlega mikið úrval skreytinga fyrir hvaða tilefni og veislu sem er.

Við erum fjölskyldufyrirtæki sem leggur mikla áherslu á faglega og persónulega þjónustu til okkar viðskiptavina.

Hugmyndin að Allt í köku varð til þegar Kristín Eik, stofnandi Allt í Köku, prófaði fyrst að nota sykurmassa til þess að skreyta kökur. Eftir það var ekki aftur snúið. Hún fékk brennandi áhuga á öllu sem viðkemur kökuskreytingum og konfektgerð. Hún vildi alltaf prófa eitthvað nýtt í hvert skipti sem hún gerði köku, en það var erfitt að nálgast áhöld, mót og hráefni til þess að gefa hugarfluginu lausan tauminn. Þar sem hún var að ljúka meistaranámi í Háskóla Íslands vann hún að hugmyndinni í nokkra mánuði áður en fyrirtækið varð til.

Sharing and caring

Kristín Eik fór á risa kökuskreytingasýningu í Bandaríkjunum árið 2010 þar sem hún fór á fjölda námskeiða og sá allt það nýjasta í bransanum. Þar kynntist hún ótrúlega skemmtilegu og frábæru fólki sem hún lærði mikið af.

„Það sem kom mér kannski mest á óvart á sýningunni er hvað kökuskreytingasamfélagið úti byggir mikið á því að deila upplýsingum. ‘Sharing and Caring’ eru einkunnarorð kökuskreytingameistara! Ég var alveg heilluð af þessu hlýja andrúmslofti og hversu tilbúnir allir voru til þess að deila öllu sem þeir vissu. Ég fann strax að ég vildi verða hluti af þessari heild.“

Í upphafi átti Allt í köku aðeins að vera á netinu. Þegar hugmyndin þróaðist aðeins fann Kristín Eik að netverslun myndi ekki þjóna þörfum viðskiptavina sinna að fullu. Vörurnar sem eru seldar í verslun er aðeins hluti af því virði sem er boðið upp á því mikil áhersla er lögð á að veita framúrskarandi þjónustu og stuðning við notkun varanna. Allar vörurnar sem eru matarkyns eru matvælavottaðar og framleiddar af sérhæfðum fyrirtækjum sem leggja mikið upp úr gæðum og fallegri vöru.

„Ég hefði aldrei getað opnað Allt í köku nema fyrir tilstilli fjölskyldu minnar og vina sem studdu mig alla leið. Ég vil þakka systur minni, Katrínu Ösp, sérstaklega fyrir allar andvökunæturnar, alla aðstoðina og vinnugleðina“

Árið 2012 varð Katrín Ösp meðeigandi Allt í köku. Hún fór til Chicago í Wilton skólann og kom til baka með mikilvæga þekkingu og reynslu sem við miðlum til viðskiptavina okkar á hverjum degi.

Við vonumst til þess að sjá sem flesta í verslun okkar á Smiðjuvegi 9 í Kópavogi. Allar okkar vörur eru á heimasíðunni okkar og þeir sem sjá sér ekki fært að koma við í versluninni okkar geta fengið allar upplýsingar í síma 567-9911 eða í tölvupósti, alltikoku@alltikoku.is. Við tökum við öllum greiðslukortum og sendum vörur um allt land.

Bestu kveðjur,
Kristín Eik, Katrín Ösp og co.